hawa bahut tez chal rahi hai main KHud ko bhi tez kar raha hun

havā bahut tez chal rahī hai maiñ ḳhud ko bhī tez kar rahā huuñ

ki apne andar kī intihāoñ ko aur mahmez kar rahā huuñ

badan huuñ maiñ aur badan zamīñ hai zamīñ meñ kartā huuñ kāsht-kārī

jo mujh ko banjar diyā gayā thā maiñ us ko zarḳhez kar rahā huuñ

banā rahā huuñ tujhe vo kursī maiñ jis pe likhne ko baiThtā thā

tū mujh ko tasrīf de ki ḳhud ko tire liye mez kar rahā huuñ

tujhe pata bhī nahīñ chalegā ki merā majzūb ho gayā tū

maiñ terī miTTī ko apne paanī meñ yuuñ ham-āmez kar rahā huuñ

banā rahā huuñ maiñ 'farhat-ullāh-ḳhāñ' ke lafzoñ ko 'farhat-ehsās'

kahīñ ho ruumī koī to sun le ki ḳhud ko tabrez kar rahā huuñ

hawa bahut tez chal rahi hai main KHud ko bhi tez kar raha hun

ki apne andar ki intihaon ko aur mahmez kar raha hun

badan hun main aur badan zamin hai zamin mein karta hun kasht-kari

jo mujh ko banjar diya gaya tha main us ko zarKHez kar raha hun

bana raha hun tujhe wo kursi main jis pe likhne ko baiThta tha

tu mujh ko tasrif de ki KHud ko tere liye mez kar raha hun

tujhe pata bhi nahin chalega ki mera majzub ho gaya tu

main teri miTTi ko apne pani mein yun ham-amez kar raha hun

bana raha hun main 'farhat-ullah-KHan' ke lafzon ko 'farhat-ehsas'

kahin ho rumi koi to sun le ki KHud ko tabrez kar raha hun