ہوا بہت تیز چل رہی ہے میں خود کو بھی تیز کر رہا ہوں

ہوا بہت تیز چل رہی ہے میں خود کو بھی تیز کر رہا ہوں

کہ اپنے اندر کی انتہاؤں کو اور مہمیز کر رہا ہوں

بدن ہوں میں اور بدن زمیں ہے زمیں میں کرتا ہوں کاشتکاری

جو مجھ کو بنجر دیا گیا تھا میں اس کو زرخیز کر رہا ہوں

بنا رہا ہوں تجھے وہ کرسی میں جس پہ لکھنے کو بیٹھتا تھا

تو مجھ کو تصریف دے کہ خود کو ترے لیے میز کر رہا ہوں

تجھے پتہ بھی نہیں چلے گا کہ میرا مجذوب ہو گیا تو

میں تیری مٹی کو اپنے پانی میں یوں ہم آمیز کر رہا ہوں

بنا رہا ہوں میں فرحت اللہ خاںؔ کے لفظوں کو فرحت احساسؔ

کہیں ہو رومی کوئی تو سن لے کہ خود کو تبریز کر رہا ہوں