ہوا کا شور اگر کان میں نہیں آتا

ہوا کا شور اگر کان میں نہیں آتا

میں اتنی دور بیابان میں نہیں آتا

میں اپنی جیت سے واقف اگر نہیں ہوتا

اکیلا حشر کے میدان میں نہیں آتا

پکارا تھا مرے ہم زاد نے مجھے ورنہ

اندھیری رات میں طوفان میں نہیں آتا

کبھی کبھی تو اسے اتنا سوچ لیتا ہوں

مرا وجود مرے دھیان میں نہیں آتا

خبر نہیں تھی مجھے کوزہ گر بھی ہے صیاد

وگرنہ جسم کے زندان میں نہیں آتا

دوبارہ آنکھ کی جانب اسے لے آتا ہوں

وہ دوست جو مری پہچان میں نہیں آتا

مرے وجود میں اب رات بھی نہیں ہوتی

سحر کا ذکر بھی امکان میں نہیں آتا

کسی بھی زاویے سے دیکھ لے کوئی آزرؔ

فلک کسی کے بھی وجدان میں نہیں آتا