hawa ke hath mein yaadon ki jab pichkariyan hongi

havā ke haath meñ yādoñ kī jab pichkāriyāñ hoñgī

bhaḌak uTTheñgī jo bhī raakh meñ chingāriyāñ hoñgī

dar-o-dīvār ko hī ghar nahīñ kahte haiñ kyā jā.ūñ

lachaktī shāḳh-e-gul hogī na hañstī kyāriyāñ hoñgī

mire āñgan meñ barg-e-ḳhushk dālānoñ meñ sannāTe

kushāda kamroñ meñ dīmak-zada almāriyāñ hoñgī

idhar sach bolne ghar se koī dīvāna niklegā

udhar maqtal meñ istiqbāl kī tayyāriyāñ hoñgī

ham ahl-e-dil ke jo kuchh dil meñ hai lab par vahī bāteñ

vo ahl-e-hosh haiñ un ke yahāñ ayyāriyāñ hoñgī

hamārā kyā chale jā.eñge hañste shahr se tere

hamāre baa'd dīvāroñ pe ḳhuuñ kī dhāriyāñ hoñgī

saroñ se pur haiñ gaDDhe ḳhuun kā chhiḌkāv hai har-sū

vo aa.eñ be-ḳhatar rāhoñ meñ ab hamvāriyāñ hoñgī

maiñ shahr aayā baḌe hī shauq se lekin ḳhabar kyā thī

yahāñ āñkheñ bichhā.e raah meñ be-kāriyāñ hoñgī

vo uTThā kārvān-e-sub.h kī aamad kā shor 'anjum'

sharīk-e-bazm-e-shab meñ kuuch kī tayyāriyāñ hoñgī

hawa ke hath mein yaadon ki jab pichkariyan hongi

bhaDak uTThengi jo bhi rakh mein chingariyan hongi

dar-o-diwar ko hi ghar nahin kahte hain kya jaun

lachakti shaKH-e-gul hogi na hansti kyariyan hongi

mere aangan mein barg-e-KHushk dalanon mein sannaTe

kushada kamron mein dimak-zada almariyan hongi

idhar sach bolne ghar se koi diwana niklega

udhar maqtal mein istiqbaal ki tayyariyan hongi

hum ahl-e-dil ke jo kuchh dil mein hai lab par wahi baaten

wo ahl-e-hosh hain un ke yahan ayyariyan hongi

hamara kya chale jaenge hanste shahr se tere

hamare ba'd diwaron pe KHun ki dhaariyan hongi

saron se pur hain gaDDhe KHun ka chhiDkaw hai har-su

wo aaen be-KHatar rahon mein ab hamwariyan hongi

main shahr aaya baDe hi shauq se lekin KHabar kya thi

yahan aankhen bichhae rah mein be-kariyan hongi

wo uTTha karwan-e-subh ki aamad ka shor 'anjum'

sharik-e-bazm-e-shab mein kuch ki tayyariyan hongi