hawa ke narm lahje mein hari-bhari ghazal khili

havā ke narm lahje meñ harī-bharī ġhazal khilī

mahak rahī thī baaġh maiñ gulāb-rang zindagī

udaas peḌ muntazir khaḌā thā ghar ke sahn meñ

utar rahī thī sīḌhiyoñ se chāñdnī bahār kī

kitāb-e-dil meñ kis ke ḳhadd-o-ḳhāl jagmagā.e the

dhaḌak rahī thī har varaq pe dīda-zeb raushnī

chahak rahā thā ik parinda dil ke ban meñ shaam se

milan ke giit gā rahī thī duur gaañv meñ nadī

khile hue the pīpaloñ ke rang is bahār meñ

kueñ pe un dinoñ basantī qahqahoñ kī guuñj thī

koī hasīñ savār kyā huā thā us maqām se

vo rail phir yahāñ kisī ke vāste nahīñ rukī

charāġh aur bhī jale hue the us qatār meñ

mirī nazar meñ jal rahā thā ik charāġh-e-āḳhirī

tamām shahr chaudhvīñ kī raat mahv-e-ḳhvāb thā

vo be-qarār jhiil mere saath jāgtī rahī

hawa ke narm lahje mein hari-bhari ghazal khili

mahak rahi thi bagh main gulab-rang zindagi

udas peD muntazir khaDa tha ghar ke sahn mein

utar rahi thi siDhiyon se chandni bahaar ki

kitab-e-dil mein kis ke KHadd-o-KHal jagmagae the

dhaDak rahi thi har waraq pe dida-zeb raushni

chahak raha tha ek parinda dil ke ban mein sham se

milan ke git ga rahi thi dur ganw mein nadi

khile hue the pipalon ke rang is bahaar mein

kuen pe un dinon basanti qahqahon ki gunj thi

koi hasin sawar kya hua tha us maqam se

wo rail phir yahan kisi ke waste nahin ruki

charagh aur bhi jale hue the us qatar mein

meri nazar mein jal raha tha ek charagh-e-aKHiri

tamam shahr chaudhwin ki raat mahw-e-KHwab tha

wo be-qarar jhil mere sath jagti rahi