hawa mein tair rahe hain sahab miTTi ke

havā meñ tair rahe haiñ sahāb miTTī ke

zamīñ pe ā.eñge ik din azaab miTTī ke

mujhe to is se ka.ī aadmī banāne the

parind bhī na bane dastiyāb miTTī ke

falak se nuur kī sūrat savāl utre the

diye zamīn ne lekin javāb miTTī ke

ye kis jahān meñ mujh ko gumān le aayā

ubhar rahe haiñ yahāñ āftāb miTTī ke

phir ek roz use chaak par utārā gayā

phir us ke ba.ad hue din ḳharāb miTTī ke

kiye ga.e the hazāroñ hī tajrabāt magar

badan rahe haiñ faqat kāmyāb miTTī ke

ye us ke naqsh kaf-e-pā haiñ aur lagte haiñ

zamīñ pe jaise khile hoñ gulāb miTTī ke

kisī ke vāste sāhir charāġh the lekin

havā ke haath pe rakkhe the ḳhvāb miTTī ke

hawa mein tair rahe hain sahab miTTi ke

zamin pe aaenge ek din azab miTTi ke

mujhe to is se kai aadmi banane the

parind bhi na bane dastiyab miTTi ke

falak se nur ki surat sawal utre the

diye zamin ne lekin jawab miTTi ke

ye kis jahan mein mujh ko guman le aaya

ubhar rahe hain yahan aaftab miTTi ke

phir ek roz use chaak par utara gaya

phir us ke baad hue din KHarab miTTi ke

kiye gae the hazaron hi tajrabaat magar

badan rahe hain faqat kaamyab miTTi ke

ye us ke naqsh kaf-e-pa hain aur lagte hain

zamin pe jaise khile hon gulab miTTi ke

kisi ke waste sahir charagh the lekin

hawa ke hath pe rakkhe the KHwab miTTi ke