hayat-o-kaenat par kitab likh rahe the hum

hayāt-o-kā.enāt par kitāb likh rahe the ham

jahāñ jahāñ savāb thā azaab likh rahe the ham

hamārī tishnagī kā ġham raqam thā mauj mauj par

samundaroñ ke jism par sarāb likh rahe the ham

savāl thā ki justujū aziim hai ki aarzū

so yuuñ huā ki umr bhar javāb likh rahe the ham

sulagte dasht, ret aur babūl the har ek sū

nagar nagar, galī galī gulāb likh rahe the ham

zamīn ruk ke chal paḌī, charāġh bujh ke jal ga.e

ki jab adhūre ḳhvāboñ kā hisāb likh rahe the ham

mujhe batānā zindagī vo kaun sī ghaḌī thī jab

ḳhud apne apne vāste azaab likh rahe the ham

chamak uThā har ek pal, mahak uThe qalam davāt

kisī ke naam dil kā intisāb likh rahe the ham

hayat-o-kaenat par kitab likh rahe the hum

jahan jahan sawab tha azab likh rahe the hum

hamari tishnagi ka gham raqam tha mauj mauj par

samundaron ke jism par sarab likh rahe the hum

sawal tha ki justuju azim hai ki aarzu

so yun hua ki umr bhar jawab likh rahe the hum

sulagte dasht, ret aur babul the har ek su

nagar nagar, gali gali gulab likh rahe the hum

zamin ruk ke chal paDi, charagh bujh ke jal gae

ki jab adhure KHwabon ka hisab likh rahe the hum

mujhe batana zindagi wo kaun si ghaDi thi jab

KHud apne apne waste azab likh rahe the hum

chamak uTha har ek pal, mahak uThe qalam dawat

kisi ke nam dil ka intisab likh rahe the hum