hazar kaam meri zindagi mein chhoD gaya

hazār kaam mirī zindagī meñ chhoḌ gayā

ki dil bhī saath mirā be-dilī meñ chhoḌ gayā

yahāñ to sirf makāñ haiñ makīñ koī bhī nahīñ

na jaane kaun mujhe is galī meñ chhoḌ gayā

ghaḌī vo chhoḌ gayā hai ki us ko 'ujlat thī

vo apnā vaqt bhī lekin ghaḌī meñ chhoḌ gayā

maiñ kaun huuñ use kaise pata chalā āḳhir

jo raat añdherā mujhe raushnī meñ chhoḌ gayā

na ghar banāyā abhī tak na ghar basāyā hai

sabhī ko pīchhe vo āvārgī meñ chhoḌ gayā

maiñ sust-rau bhī nahīñ huuñ shikasta-pā bhī nahīñ

vo qāfila mujhe begāngī meñ chhoḌ gayā

'ajīb shaḳhs thā ‘kāshif-husain-ġhā.ir’ bhī

ki ġham meñ saath rahā aur ḳhushī meñ chhoḌ gayā

hazar kaam meri zindagi mein chhoD gaya

ki dil bhi sath mera be-dili mein chhoD gaya

yahan to sirf makan hain makin koi bhi nahin

na jaane kaun mujhe is gali mein chhoD gaya

ghaDi wo chhoD gaya hai ki us ko 'ujlat thi

wo apna waqt bhi lekin ghaDi mein chhoD gaya

main kaun hun use kaise pata chala aaKHir

jo raat andhera mujhe raushni mein chhoD gaya

na ghar banaya abhi tak na ghar basaya hai

sabhi ko pichhe wo aawargi mein chhoD gaya

main sust-rau bhi nahin hun shikasta-pa bhi nahin

wo qafila mujhe begangi mein chhoD gaya

'ajib shaKHs tha ‘kashif-husain-ghair’ bhi

ki gham mein sath raha aur KHushi mein chhoD gaya