hazar phul liye mausam-e-bahaar aae

hazār phuul liye mausam-e-bahār aa.e

jo dil ho suukh ke kāñTā to kyā qarār aa.e

javāb le ke phirī shukr naza.a kī hichkī

vo ab pukārte haiñ ham jinheñ pukār aa.e

sulajh sakīñ na mirī mushkileñ magar dekhā

ulajh ga.e the jo gesū unheñ sañvār aa.e

falak ko dekh ke hañste ye gul to achchhā thā

jo abr aa.e vo gulshan pe ashk-bār aa.e

bahut se yaad haiñ mahfil meñ baiThne vaale

kabhī to bhuul ke koī sar-e-mazār aa.e

abhī hai ġhuncha-e-dil kī shaguftagī mumkin

hazār baar agar mausam-e-bahār aa.e

ye be-muravvatiyāñ dekhiye ki lab na hile

jo paas the ham unheñ duur tak pukār aa.e

javāb mil to gayā go vo dil-shikan hī sahī

yahī sadā mire mālik phir ek baar aa.e

añdherī raat thī achchhā kiyā jo ai 'sāqib'

charāġh le ke sū-e-zulmat-e-mazār aa.e

hazar phul liye mausam-e-bahaar aae

jo dil ho sukh ke kanTa to kya qarar aae

jawab le ke phiri shukr naza ki hichki

wo ab pukarte hain hum jinhen pukar aae

sulajh sakin na meri mushkilen magar dekha

ulajh gae the jo gesu unhen sanwar aae

falak ko dekh ke hanste ye gul to achchha tha

jo abr aae wo gulshan pe ashk-bar aae

bahut se yaad hain mahfil mein baiThne wale

kabhi to bhul ke koi sar-e-mazar aae

abhi hai ghuncha-e-dil ki shaguftagi mumkin

hazar bar agar mausam-e-bahaar aae

ye be-murawwatiyan dekhiye ki lab na hile

jo pas the hum unhen dur tak pukar aae

jawab mil to gaya go wo dil-shikan hi sahi

yahi sada mere malik phir ek bar aae

andheri raat thi achchha kiya jo ai 'saqib'

charagh le ke su-e-zulmat-e-mazar aae