hazaron sar kisi ke panw par dekhe nahin jate

hazāroñ sar kisī ke paañv par dekhe nahīñ jaate

nizām-e-zar ke ye zer-o-zabar dekhe nahīñ jaate

ahāte ye rivājoñ ke ye dīvāreñ samājoñ kī

diloñ ke shahr meñ patthar ke ghar dekhe nahīñ jaate

ulaT do in naqāboñ ko ye parde chaak kar Daalo

ghaTāoñ ke lapeTe meñ qamar dekhe nahīñ jaate

masarrat jin se bargashta aziyyat jaan kā hissa

ye lāshe zindagī ke dosh par dekhe nahīñ jaate

kisī kā zikr hī chheḌo ki dil ke daaġh raushan hoñ

ye muñh kaale añdhere raat bhar dekhe nahīñ jaate

lifāfa sirf badlā hai abhī mazmūñ nahīñ badlā

vahī rahbar ba-andāz-e-digar dekhe nahīñ jaate

nazar se jab nazar miltī hai 'ālam aur hotā hai

utar aate haiñ vo dil meñ magar dekhe nahīñ jaate

kisī kā dil hathelī par tumhārī kyā qayāmat hai

ye TukḌe kāñch ke yuuñ aañch par dekhe nahīñ jaate

kabhī āñkheñ kabhī ham dil kabhī jaañ tak bichhāte haiñ

guloñ ke paañv 'afsar' ḳhaak par dekhe nahīñ jaate

hazaron sar kisi ke panw par dekhe nahin jate

nizam-e-zar ke ye zer-o-zabar dekhe nahin jate

ahate ye riwajon ke ye diwaren samajon ki

dilon ke shahr mein patthar ke ghar dekhe nahin jate

ulaT do in naqabon ko ye parde chaak kar Dalo

ghaTaon ke lapeTe mein qamar dekhe nahin jate

masarrat jin se bargashta aziyyat jaan ka hissa

ye lashe zindagi ke dosh par dekhe nahin jate

kisi ka zikr hi chheDo ki dil ke dagh raushan hon

ye munh kale andhere raat bhar dekhe nahin jate

lifafa sirf badla hai abhi mazmun nahin badla

wahi rahbar ba-andaz-e-digar dekhe nahin jate

nazar se jab nazar milti hai 'alam aur hota hai

utar aate hain wo dil mein magar dekhe nahin jate

kisi ka dil hatheli par tumhaari kya qayamat hai

ye TukDe kanch ke yun aanch par dekhe nahin jate

kabhi aankhen kabhi hum dil kabhi jaan tak bichhate hain

gulon ke panw 'afsar' KHak par dekhe nahin jate