hazrat-e-munsif koi ilham to batlaiye

hazrat-e-munsif koī ilhām to batlā.iye

faisla farmā diyā ilzām to batlā.iye

aap hī munsif yahāñ par aap hī haiñ mudda.ī

ḳhair jo bhī hai mirā anjām to batlā.iye

aap ke nazdīk gar ahd-e-vafā ik khel hai

kyā milegā jiit kar in.aam to batlā.iye

hashr rāñjhe kā bayāñ karte haiñ sāhab aap kyoñ

koī ham sā hai agar nākām to batlā.iye

baad muddat mil rahe haiñ aaj apne aap se

bhuul baiThe haiñ hamārā naam to batlā.iye

ishq ke bāzār meñ haiñ tājiroñ ke sarbarāh

ham ko bhī koī munāsib daam to batlā.iye

chaak dil ke dard saare jo bhulā de bin piye

aap kī āñkhoñ meñ hai vo jaam to batlā.iye

kal talak nazreñ churā.e phir rahe the aap to

aaj hañs kar mil raheñ haiñ kaam to batlā.iye

ḳhat meñ sab kuchh thā magar jo thā zarūrī rah gayā

aa.e un kā phir kabhī paiġhām to batlā.iye

vo nazāre vo bahāreñ ḳhushbuoñ meñ tar fazā

aap ko bhī yaad hai vo shaam to batlā.iye

fursatoñ ke pal meñ pyāre ishq kar ke dekhnā

phir mayassar ho kabhī ārām to batlā.iye

sāhab-e-mai-kash hai bāda-ḳhvār hai vo nā-murād

aap haiñ 'sādiq' se bhī badnām to batlā.iye

hazrat-e-munsif koi ilham to batlaiye

faisla farma diya ilzam to batlaiye

aap hi munsif yahan par aap hi hain muddai

KHair jo bhi hai mera anjam to batlaiye

aap ke nazdik gar ahd-e-wafa ek khel hai

kya milega jit kar inam to batlaiye

hashr ranjhe ka bayan karte hain sahab aap kyon

koi hum sa hai agar nakaam to batlaiye

baad muddat mil rahe hain aaj apne aap se

bhul baiThe hain hamara nam to batlaiye

ishq ke bazar mein hain tajiron ke sarbarah

hum ko bhi koi munasib dam to batlaiye

chaak dil ke dard sare jo bhula de bin piye

aap ki aankhon mein hai wo jam to batlaiye

kal talak nazren churae phir rahe the aap to

aaj hans kar mil rahen hain kaam to batlaiye

KHat mein sab kuchh tha magar jo tha zaruri rah gaya

aae un ka phir kabhi paigham to batlaiye

wo nazare wo bahaaren KHushbuon mein tar faza

aap ko bhi yaad hai wo sham to batlaiye

fursaton ke pal mein pyare ishq kar ke dekhna

phir mayassar ho kabhi aaram to batlaiye

sahab-e-mai-kash hai baada-KHwar hai wo na-murad

aap hain 'sadiq' se bhi badnam to batlaiye