hijr ke honTon pe aandhi ki dua bhi aae hai

hijr ke hoñToñ pe āñdhī kī duā bhī aa.e hai

shāḳh TuuTe hai to phir panchhī bahut pachhtā.e hai

mast sahrā kī havā.eñ bandisheñ sab chāk-chāk

dil kisī be-nām duniyā ke tarāne gaa.e hai

barf se Dhakne lagī haiñ sab pahāḌī choTiyāñ

apne hī āġhosh meñ māhaul sahmā jaa.e hai

kyā ajab barham fazā hai fasl-e-gul jaane ko hai

har shajar par ek dhānī dard sā lahrā.e hai

lā-ta.alluq huuñ maiñ in kaalī sadāoñ se magar

karb se shīrāza-e-ehsās bikhrā jaa.e hai

ai 'niyāz' ab kyā likhūñ andhe safar ke baab meñ

gar kisī daldal se niklūñ to samandar aa.e hai

hijr ke honTon pe aandhi ki dua bhi aae hai

shaKH TuTe hai to phir panchhi bahut pachhtae hai

mast sahra ki hawaen bandishen sab chaak-chaak

dil kisi be-nam duniya ke tarane gae hai

barf se Dhakne lagi hain sab pahaDi choTiyan

apne hi aaghosh mein mahaul sahma jae hai

kya ajab barham faza hai fasl-e-gul jaane ko hai

har shajar par ek dhani dard sa lahrae hai

la-talluq hun main in kali sadaon se magar

karb se shiraaza-e-ehsas bikhra jae hai

ai 'niyaz' ab kya likhun andhe safar ke bab mein

gar kisi daldal se niklun to samandar aae hai