himmat junun azm irada liye hue

himmat junūn azm irāda liye hue

chaltā huuñ apne saath maiñ kyā kyā liye hue

rishta sañbhālne meñ lagā huuñ maiñ mom ke

hālāt haiñ ki dhuup kā TukḌā liye hue

mahrūmiyoñ kā yuuñ bhī kiyā maiñ ne ehtirām

niklā nahīñ huuñ haath meñ kaasa liye hue

detā huuñ roz ḳhud ko dilāse hayāt ke

shānoñ pe apne aap kā lāsha liye hue

ik roz dūñgā sab kī samā.at pe dastakeñ

apne qalam se niklā tarāna liye hue

sab gum-shuda khaḌe haiñ zamāne kī bhiiḌ meñ

manzil kā apnī dhuñdlā se naqsha liye hue

kamiyāñ nikāl kar vo mirī sharmsār thā

aaya thā ek shaḳhs jo shīsha liye hue

himmat junun azm irada liye hue

chalta hun apne sath main kya kya liye hue

rishta sanbhaalne mein laga hun main mom ke

haalat hain ki dhup ka TukDa liye hue

mahrumiyon ka yun bhi kiya main ne ehtiram

nikla nahin hun hath mein kasa liye hue

deta hun roz KHud ko dilase hayat ke

shanon pe apne aap ka lasha liye hue

ek roz dunga sab ki samaat pe dastaken

apne qalam se nikla tarana liye hue

sab gum-shuda khaDe hain zamane ki bhiD mein

manzil ka apni dhundla se naqsha liye hue

kamiyan nikal kar wo meri sharmsar tha

aaya tha ek shaKHs jo shisha liye hue