ہمت و عزم بدل جرأت کردار بدل

ہمت و عزم بدل جرأت کردار بدل

رخ دوراں کو پلٹ وقت کی رفتار بدل

اب تو کہتے ہو وفا ہم سے کرو گے لیکن

وقت آنے پہ کہیں جائے نہ سرکار بدل

حشر سے قبل کہیں حشر نہ برپا ہو جائے

دیکھ للہ ذرا شوخئ رفتار بدل

گر بدلتا ہے تجھے دہر کا فرسودہ نظام

تجھ پہ لازم ہے کہ ہر بات کا معیار بدل

منزل عشق نہیں عقل کے بس کی اے دوست

ہے اگر صاحب دل قافلہ سالار بدل

تیری رحمت پہ جو ہوتا نہ بھروسا ان کو

عین ممکن ہے کہ جاتے یہ گنہ گار بدل