hisar-e-zat mein koi simaT gaya to kya hua

hisār-e-zāt meñ koī simaT gayā to kyā huā

tamām kā.enāt se vo kaT gayā to kyā huā

bahut se tishna-kām-e-shauq surḳh-rū to ho ga.e

hamārā ḳhuun dostoñ meñ baT gayā to kyā huā

abhī to moḌ moḌ par pahāḌ hī pahāḌ haiñ

vo ek sang rāste se haT gayā to kyā huā

diloñ meñ iḳhtilāf kī ḳhalīj aur baḌh ga.ī

ba-zor-e-teġh mas.ala nipaT gayā to kyā huā

ġhubār nafratoñ kā to diloñ meñ hai bharā huā

fazā se abr-e-kusht-o-ḳhūn chhaT gayā to kyā huā

zabāñ kā paas lāzmī ḳhudā-parast ke liye

zabāñ se bul-havas koī palaT gayā to kyā huā

nazar-navāz ḳhil'ateñ to zindagī ko mil ga.iiñ

libās-e-gard-gard ek phaT gayā to kyā huā

hazāroñ sarfarosh haiñ kafan-badosh to abhī

sar-e-'azīz-baghravī’ jo kaT gayā to kyā huā

hisar-e-zat mein koi simaT gaya to kya hua

tamam kaenat se wo kaT gaya to kya hua

bahut se tishna-kaam-e-shauq surKH-ru to ho gae

hamara KHun doston mein baT gaya to kya hua

abhi to moD moD par pahaD hi pahaD hain

wo ek sang raste se haT gaya to kya hua

dilon mein iKHtilaf ki KHalij aur baDh gai

ba-zor-e-tegh masala nipaT gaya to kya hua

ghubar nafraton ka to dilon mein hai bhara hua

faza se abr-e-kusht-o-KHun chhaT gaya to kya hua

zaban ka pas lazmi KHuda-parast ke liye

zaban se bul-hawas koi palaT gaya to kya hua

nazar-nawaz KHil'aten to zindagi ko mil gain

libas-e-gard-gard ek phaT gaya to kya hua

hazaron sarfarosh hain kafan-badosh to abhi

sar-e-'aziz-baghrawi’ jo kaT gaya to kya hua