ho aae ek bar to jata hai bar bar

ho aa.e ek baar to jaatā hai baar baar

ḳhum-ḳhāna aadmī ko bulātā hai baar baar

ye aur baat hai ki koī dekhtā nahīñ

ham-zād aa.ina to dikhātā hai baar baar

vo zaat jo ra.ūf-o-rahīm-o-karīm hai

vā'iz hameñ usī se Darātā hai baar baar

kam-zarf mezbān kī dā'vat nahīñ qubūl

thoḌī bahut pilā ke jatānā hai baar baar

duurī hai mustaqil na rifāqat hai mustaqil

vo dil ujāḌtā hai basātā hai baar baar

bād-e-sabā pukār ke aage chalī ga.ī

so.e hue ko kaun jagātā hai baar baar

parvardigār use agar aanā nahīñ kabhī

us kā ḳhayāl kyoñ hameñ aatā hai baar baar

azbar hai apnī rām-kahānī 'sha'ūr' ko

ek ek vāqi'a vo sunātā hai baar baar

ho aae ek bar to jata hai bar bar

KHum-KHana aadmi ko bulata hai bar bar

ye aur baat hai ki koi dekhta nahin

ham-zad aaina to dikhata hai bar bar

wo zat jo rauf-o-rahim-o-karim hai

wa'iz hamein usi se Daraata hai bar bar

kam-zarf mezban ki da'wat nahin qubul

thoDi bahut pila ke jatana hai bar bar

duri hai mustaqil na rifaqat hai mustaqil

wo dil ujaDta hai basata hai bar bar

baad-e-saba pukar ke aage chali gai

soe hue ko kaun jagata hai bar bar

parwardigar use agar aana nahin kabhi

us ka KHayal kyon hamein aata hai bar bar

azbar hai apni ram-kahani 'sha'ur' ko

ek ek waqi'a wo sunata hai bar bar