ho chuki hijrat to phir kya farz hai ghar dekhna

ho chukī hijrat to phir kyā farz hai ghar dekhnā

apnī fitrat meñ nahīñ pīchhe palaT kar dekhnā

ab vo bargad hai na vo panghaT na ab vo gopiyāñ

aise pas-manzar meñ kyā gaañv kā manzar dekhnā

jāda-e-gul kī masāfat hī nahīñ hai zindagī

zindagī karnā hai añgāroñ pe chal kar dekhnā

apne muḳhlis dostoñ par vaar maiñ kaise karūñ

koī dushman sāmne aa.e to jauhar dekhnā

pyaas hoñToñ par liye baiThā huuñ sāhil par magar

zid pe aa jā.ūñ to kuuze meñ samundar dekhnā

khiḌkiyāñ khulte hī ham hoñge nishāna vaqt kā

zaḳhm siine par sajānā ho to bāhar dekhnā

mere hāthoñ kī lakīroñ meñ hai gardish vaqt kī

merī qismat hī meñ likkhā thā ye chakkar dekhnā

zindagī bhar Thokareñ khāne se behtar hai 'zafar'

rāsta chalte hue raste ke patthar dekhnā

ho chuki hijrat to phir kya farz hai ghar dekhna

apni fitrat mein nahin pichhe palaT kar dekhna

ab wo bargad hai na wo panghaT na ab wo gopiyan

aise pas-manzar mein kya ganw ka manzar dekhna

jada-e-gul ki masafat hi nahin hai zindagi

zindagi karna hai angaron pe chal kar dekhna

apne muKHlis doston par war main kaise karun

koi dushman samne aae to jauhar dekhna

pyas honTon par liye baiTha hun sahil par magar

zid pe aa jaun to kuze mein samundar dekhna

khiDkiyan khulte hi hum honge nishana waqt ka

zaKHm sine par sajaana ho to bahar dekhna

mere hathon ki lakiron mein hai gardish waqt ki

meri qismat hi mein likkha tha ye chakkar dekhna

zindagi bhar Thokaren khane se behtar hai 'zafar'

rasta chalte hue raste ke patthar dekhna