ho ke duniya se pareshan kahan jata hai

ho ke duniyā se pareshān kahāñ jaatā hai

kaam hoñge tire āsān kahāñ jaatā hai

jab kabhī hotā thā ġhamgīn to maañ kahtī thī

aa mire paas mirī jaan kahāñ jaatā hai

tere hī dar pe use miltī hai rāhat maulā

aur haarā huā insān kahāñ jaatā hai

dhyān markūz karūñgā maiñ tirī āñkhoñ par

phir ye dekhūñgā tirā dhyān kahāñ jaatā hai

roz siine meñ dhaḌaktā hai jo dhaḌkan ban kar

jaane vo niiñd ke daurān kahāñ jaatā hai

mere kamre se churātī thī vo chīzeñ aur maiñ

DhūñDhtā thā mirā sāmān kahāñ jaatā hai

jab koī dekhne vaalā nahīñ hotā tujh ko

ai musalmāñ tirā īmān kahāñ jaatā hai

be-namāzī jahāñ 'shahzād' hoñ sab ghar vaale

un gharoñ se bhalā shaitān kahāñ jaatā hai

ho ke duniya se pareshan kahan jata hai

kaam honge tere aasan kahan jata hai

jab kabhi hota tha ghamgin to man kahti thi

aa mere pas meri jaan kahan jata hai

tere hi dar pe use milti hai rahat maula

aur haara hua insan kahan jata hai

dhyan markuz karunga main teri aankhon par

phir ye dekhunga tera dhyan kahan jata hai

roz sine mein dhaDakta hai jo dhaDkan ban kar

jaane wo nind ke dauran kahan jata hai

mere kamre se churaati thi wo chizen aur main

DhunDhta tha mera saman kahan jata hai

jab koi dekhne wala nahin hota tujh ko

ai musalman tera iman kahan jata hai

be-namazi jahan 'shahzad' hon sab ghar wale

un gharon se bhala shaitan kahan jata hai