ho na kuchh baat magar shor machae rakhna

ho na kuchh baat magar shor machā.e rakhnā

is tarah auroñ ko hamdard banā.e rakhnā

tum agar chāhte ho sab tumheñ hañs hañs ke mileñ

apnā ġham apne hī siine meñ chhupā.e rakhnā

duur karnā na kabhī jalvoñ ko mere dil se

is chaman ko inhīñ phūloñ se sajā.e rakhnā

is se pur-nūr huā merī tamannā kā diyā

ruḳh-e-raushan se yūñhī parda uThā.e rakhnā

ye hamārā hī kaleja hai ki tere ġham ko

dil kī mānind kaleje se lagā.e rakhnā

ye adā un kī masīhā bhī hai qātil bhī hai

sāmne aa ke nigāhoñ ko jhukā.e rakhnā

tum agar chāhte ho koī tamannā na rahe

haath har ek tamannā se uThā.e rakhnā

dar-e-mahbūb pe har vaqt paḌe rahnā 'jigar'

ya.anī us dar ko dar-e-ka.aba banā.e rakhnā

ho na kuchh baat magar shor machae rakhna

is tarah auron ko hamdard banae rakhna

tum agar chahte ho sab tumhein hans hans ke milen

apna gham apne hi sine mein chhupae rakhna

dur karna na kabhi jalwon ko mere dil se

is chaman ko inhin phulon se sajae rakhna

is se pur-nur hua meri tamanna ka diya

ruKH-e-raushan se yunhi parda uThae rakhna

ye hamara hi kaleja hai ki tere gham ko

dil ki manind kaleje se lagae rakhna

ye ada un ki masiha bhi hai qatil bhi hai

samne aa ke nigahon ko jhukae rakhna

tum agar chahte ho koi tamanna na rahe

hath har ek tamanna se uThae rakhna

dar-e-mahbub pe har waqt paDe rahna 'jigar'

yani us dar ko dar-e-kaba banae rakhna