hona to nahin chahiye par jaan hua to

honā to nahīñ chāhiye par jaan huā to

ye Dar hai tirā dil kahīñ zindān huā to

merī to ye hasrat hai maza luuñ maiñ tapan kā

par aag kā kuchh aur hī armān huā to

dhutkār diyā ham ne use kah ke bhikārī

darvesh ke is bhes meñ sultān huā to

ḳhvāboñ meñ tire lams se maiñ kaañp rahā huuñ

ye hādisa gar vasl ke daurān huā to

ye soch ke ghabrātā hai har ek sipāhī

arjun kā agar merī taraf dhyān huā to

kyā ho ki sabhī log faqat vahm hoñ merā

duniyā meñ akelā hī maiñ insān huā to

hona to nahin chahiye par jaan hua to

ye Dar hai tera dil kahin zindan hua to

meri to ye hasrat hai maza lun main tapan ka

par aag ka kuchh aur hi arman hua to

dhutkar diya hum ne use kah ke bhikari

darwesh ke is bhes mein sultan hua to

KHwabon mein tere lams se main kanp raha hun

ye hadisa gar wasl ke dauran hua to

ye soch ke ghabraata hai har ek sipahi

arjun ka agar meri taraf dhyan hua to

kya ho ki sabhi log faqat wahm hon mera

duniya mein akela hi main insan hua to