honTon pe suKHan aaankhon mein nam bhi nahin ab ke

hoñToñ pe suḳhan ā.ankhoñ meñ nam bhī nahīñ ab ke

is tarah vo bichhḌā hai ki ġham bhī nahīñ ab ke

ḳhud ko dil-e-sarkash ne bhī rakkhā na kahīñ kā

jiine pe razā-mand to ham bhī nahīñ ab ke

tanhā haiñ to darpesh haiñ ḳhatrāt-e-safar aur

yuuñ be-sar-o-sāmāñ yahāñ kam bhī nahīñ ab ke

kyā kahiye ki jo muñh meñ zabāñ bhī nahīñ apnī

afsos ki hāthoñ meñ qalam bhī nahīñ ab ke

be-rahm judā.ī kā sabab bhī nahīñ ma.alūm

ik-gūna ta.alluq kā bharam bhī nahīñ ab ke

kyā jaane 'mujībī' dil-e-qātil meñ hai kyā aaj

mahzar meñ koī jurm raqam bhī nahīñ ab ke

honTon pe suKHan aaankhon mein nam bhi nahin ab ke

is tarah wo bichhDa hai ki gham bhi nahin ab ke

KHud ko dil-e-sarkash ne bhi rakkha na kahin ka

jine pe raza-mand to hum bhi nahin ab ke

tanha hain to darpesh hain KHatraat-e-safar aur

yun be-sar-o-saman yahan kam bhi nahin ab ke

kya kahiye ki jo munh mein zaban bhi nahin apni

afsos ki hathon mein qalam bhi nahin ab ke

be-rahm judai ka sabab bhi nahin malum

ik-guna talluq ka bharam bhi nahin ab ke

kya jaane 'mujibi' dil-e-qatil mein hai kya aaj

mahzar mein koi jurm raqam bhi nahin ab ke