ہوش میں آئیں تو کیا ہوش میں آئے نہ بنے

ہوش میں آئیں تو کیا ہوش میں آئے نہ بنے

بے خودی اپنی وہ پردہ کہ اٹھائے نہ بنے

چاک دل چاک جگر چاک گریباں مت دیکھ

مجھ سے یوں لٹ کے ترے سامنے آئے نہ بنے

ناامیدی کا سکوں بھی مری قسمت میں نہیں

شمع امید بجھاؤں تو بجھائے نہ بنے

ہم تو ناکام پلٹ آئیں پہ اے جان حیات

نامرادانہ تری بزم سے آئے نہ بنے

ہائے وہ لوح جبیں اور وہ تحریر وفا

کس طرح اس کو بھلاؤں کہ بھلائے نہ بنے

اپنی ناکام محبت پہ پشیماں ہوں پیامؔ

زیست سے آنکھ ملاؤں تو ملائے نہ بنے