hua na KHatm saron se azab barish ka

huā na ḳhatm saroñ se azaab bārish kā

vahī hai shahr vahī mas.ala rihā.ish kā

zamīñ kī kokh ujaḌ jaa.e ab ke bārish meñ

pata chale na hameñ āsmāñ kī sāzish kā

yahāñ ke log bhī hote the devtā jaise

baḌā rivāj thā is gaañv meñ parastish kā

pahan rakhe the sabhī ne zarūratoñ ke libās

kisī ko shauq na thā jism kī numā.ish kā

ye aur baat ki ham ab bhī roz milte haiñ

tilism TuuT chukā varna terī ḳhvāhish kā

ki vo mile to salām-o-duā na ho us se

lihāz itnā bhī rakkhā na jaa.e bandish kā

'shakīl' pūchhne vāloñ ko kyā batātā maiñ

koī sabab hī nahīñ thā hamārī ranjish kā

hua na KHatm saron se azab barish ka

wahi hai shahr wahi masala rihaish ka

zamin ki kokh ujaD jae ab ke barish mein

pata chale na hamein aasman ki sazish ka

yahan ke log bhi hote the dewta jaise

baDa riwaj tha is ganw mein parastish ka

pahan rakhe the sabhi ne zaruraton ke libas

kisi ko shauq na tha jism ki numaish ka

ye aur baat ki hum ab bhi roz milte hain

tilism TuT chuka warna teri KHwahish ka

ki wo mile to salam-o-dua na ho us se

lihaz itna bhi rakkha na jae bandish ka

'shakil' puchhne walon ko kya batata main

koi sabab hi nahin tha hamari ranjish ka