hua raushan dam-e-KHurshid se phir rang pani ka

huā raushan dam-e-ḳhurshīd se phir rañg paanī kā

damak uTThā hai mere aa.ine par zañg paanī kā

muqayyad rañg khilte hoñ kisī billor se jaise

khulā is tarah mere ḳhvāb par arzañg paanī kā

kisī anjān ḳhushbū se tabī.at sair hai us kī

agarche qāfiya kuchh roz se hai tañg paanī kā

satātā hai jo dasht-e-nā-murādī ke asīroñ ko

vo taarā us hasīñ ke sāmne hai dañg paanī kā

bahut hī yaad aatā hai koī bachhḌā huā mujh ko

kabhī jab sāmnā kartā huuñ shoḳh-o-shañg paanī kā

abhī fursat nahīñ hai kār-e-duniyā meñ ulajhne kī

magar tabdīl kar saktā huuñ maiñ bhī Dhañg paanī kā

bahut din se maiñ 'sājid' darmiyāñ huuñ apne pyāroñ ke

ki ThanDā paḌ chukā hai ab mahāz-e-jañg paanī kā

hua raushan dam-e-KHurshid se phir rang pani ka

damak uTTha hai mere aaine par zang pani ka

muqayyad rang khilte hon kisi billor se jaise

khula is tarah mere KHwab par arzang pani ka

kisi anjaan KHushbu se tabiat sair hai us ki

agarche qafiya kuchh roz se hai tang pani ka

satata hai jo dasht-e-na-muradi ke asiron ko

wo tara us hasin ke samne hai dang pani ka

bahut hi yaad aata hai koi bachhDa hua mujh ko

kabhi jab samna karta hun shoKH-o-shang pani ka

abhi fursat nahin hai kar-e-duniya mein ulajhne ki

magar tabdil kar sakta hun main bhi Dhang pani ka

bahut din se main 'sajid' darmiyan hun apne pyaron ke

ki ThanDa paD chuka hai ab mahaz-e-jang pani ka