hue ho kis liye barham azizam

hue ho kis liye barham azīzam

sar-e-taslīm hai lo ḳham azīzam

charāġh-e-hujra-e-jāñ kī ḳhabar lo

laboñ par aa gayā hai dam azīzam

nahīñ bhartā ye zaḳhm-e-hijr apnā

lagāo vasl kā marham azīzam

tum aate ho to dam aatā hai goyā

tum aate ho magar kam kam azīzam

nabūd-o-būd kī is kashmakash meñ

ajab hai hālat-e-paiham azīzam

tū hī tū hai maiñ qatra tū samundar

ye man aanam ki man dānam azīzam

hamī haiñ kushtagān-e-vaqt-e-rafta

azīz-az-jān haiñ ye ġham azīzam

vajūd-e-rafta-e-raftār-e-manzil

sarā-e-hastī-e-ālim azīzam

ḳhumār-e-tishna-kāmī chashm-e-goyam

shunīdan aks-e-jām-e-jam azīzam

hue ho kis liye barham azizam

sar-e-taslim hai lo KHam azizam

charagh-e-hujra-e-jaan ki KHabar lo

labon par aa gaya hai dam azizam

nahin bharta ye zaKHm-e-hijr apna

lagao wasl ka marham azizam

tum aate ho to dam aata hai goya

tum aate ho magar kam kam azizam

nabud-o-bud ki is kashmakash mein

ajab hai haalat-e-paiham azizam

tu hi tu hai main qatra tu samundar

ye man aanam ki man danam azizam

hami hain kushtagan-e-waqt-e-rafta

aziz-az-jaan hain ye gham azizam

wajud-e-rafta-e-raftar-e-manzil

sara-e-hasti-e-alim azizam

KHumar-e-tishna-kaami chashm-e-goyam

shunidan aks-e-jam-e-jam azizam