ہجوم شہر سے ہے اب تلاش ویرانہ

ہجوم شہر سے ہے اب تلاش ویرانہ

خرد کی بھیڑ سے گھبرا گیا ہے دیوانہ

کشادہ ظرف ہے کتنی یہ بزم رندانہ

جناب شیخ کو سمجھا نہیں ہے بیگانہ

کتاب زیست ہے مجموعہ اک فسانوں کا

اسی میں ہے کہیں میرا بھی ایک افسانہ

پلا کچھ اور اے ساقی کہ ہوش ہے اب تک

کسی کی یاد میں حائل ہے شور مے خانہ

جسے بھی دیکھیے ماتم گزار قسمت ہے

ہوس نے کر دیا دنیا کو اک عزا خانہ

ہمیں سے مے کدہ سالکؔ ہمیں رہیں پیاسے

چلو اٹھو کہ بدل دیں نظام مے خانہ