husn aisa hai ki tafsil bhi kam paD jae

husn aisā hai ki tafsīl bhī kam paḌ jaa.e

chāñd kā 'aks bane jhiil bhī kam paḌ jaa.e

muḳhtasar 'umr magar ḳhvāhisheñ itnī haiñ ki bas

‘amr 'ayyār kī zambīl bhī kam paḌ jaa.e

maiñ jo lag jā.ūñ sunāne tujhe pardes ke dukh

saal do saal kī tā'tīl bhī kam paḌ jaa.e

yaar to ḳhair sabhī kūfiyoñ jaise haiñ magar

bhaa.ī aise haiñ ki qābīl bhī kam paḌ jaa.e

mere jugnū tū kahāñ tak ise raushan karegā

is siyah raat meñ qindīl bhī kam paḌ jaa.e

chāñdnī raat vo aa jaa.e sar-e-bām agar

chāñd se nuur kī tarsīl bhī kam paḌ jaa.e

āyat-e-‘ishq kā inkār kiyā hai jis ne

aise munkir ko to injīl bhī kam paḌ jaa.e

husn aisa hai ki tafsil bhi kam paD jae

chand ka 'aks bane jhil bhi kam paD jae

muKHtasar 'umr magar KHwahishen itni hain ki bas

‘amr 'ayyar ki zambil bhi kam paD jae

main jo lag jaun sunane tujhe pardes ke dukh

sal do sal ki ta'til bhi kam paD jae

yar to KHair sabhi kufiyon jaise hain magar

bhai aise hain ki qabil bhi kam paD jae

mere jugnu tu kahan tak ise raushan karega

is siyah raat mein qindil bhi kam paD jae

chandni raat wo aa jae sar-e-baam agar

chand se nur ki tarsil bhi kam paD jae

aayat-e-‘ishq ka inkar kiya hai jis ne

aise munkir ko to injil bhi kam paD jae