husn-e-imkan rang-e-ruKH rang-e-badan zad par raha

husn-e-imkāñ rang-e-ruḳh rang-e-badan zad par rahā

kyā batā.ūñ maiñ tujhe kyā kyā sajan zad par rahā

aql vāloñ par vahāñ khulte haiñ az-ḳhud rāste

jis galī meñ ik mirā dīvāna-pan zad par rahā

har suḳhan ko toltā huuñ boltā huuñ muñh se phir

jaane kyoñ phir bhī mirā zauq-e-suḳhan zad par rahā

ho rahī hai is tarah tajdīd har ik ḳhvāb kī

jo bachā thā aañkh meñ aks-e-kuhan zad par rahā

ishq par hone lagī haiñ tohmatoñ kī yūrisheñ

husn-e-be-parvā se chāk-e-pairahan zad par rahā

husn-e-imkan rang-e-ruKH rang-e-badan zad par raha

kya bataun main tujhe kya kya sajan zad par raha

aql walon par wahan khulte hain az-KHud raste

jis gali mein ek mera diwana-pan zad par raha

har suKHan ko tolta hun bolta hun munh se phir

jaane kyon phir bhi mera zauq-e-suKHan zad par raha

ho rahi hai is tarah tajdid har ek KHwab ki

jo bacha tha aankh mein aks-e-kuhan zad par raha

ishq par hone lagi hain tohmaton ki yurishen

husn-e-be-parwa se chaak-e-pairahan zad par raha