husn ki wo suraten KHwab-e-pareshan ho gain

husn kī vo sūrateñ ḳhvāb-e-pareshāñ ho ga.iiñ

parda-e-dil meñ lagā kar aag pinhāñ ho ga.iiñ

miT ke bhī ā.īna-e-ruḳhsār-e-ḳhūbāñ ho ga.iiñ

ḳhūn-e-ahl-e-ishq kī būñdeñ gulistāñ ho ga.iiñ

chhup ga.iiñ āñkhoñ se zarroñ meñ numāyāñ ho ga.iiñ

bastiyāñ ujḌī huī mil kar bayābāñ ho ga.iiñ

dekhtā kaun aur bujhātā kaun us dil kī lagī

haDDiyāñ jal jal ke sham-e-zer-e-dāmāñ ho ga.iiñ

zindagī meñ kyā mujhe miltī balāoñ se najāt

jo duā.eñ kiiñ vo sab terī nigahbāñ ho ga.iiñ

is havā-e-dahr meñ jam.īyat-e-ḳhātir kahāñ

dil ko jaane do ye zulfeñ kyuuñ pareshāñ ho ga.iiñ

zo.af baaqī hai koī jis kā nahīñ pursān-e-hāl

quvvateñ sab nazr-e-ishq-e-fitna-sāmāñ ho ga.iiñ

luuT lī gardūñ ne āḳhir dil kī saarī kā.enāt

kuchh tamannā.eñ thiiñ vo bhī vaqf-e-nisyāñ ho ga.iiñ

dost-dār-e-gul huuñ maiñ kis ne qafas se kah diyā

mujh ko pā kar tīliyāñ ḳhār-e-muġhīlāñ ho ga.iiñ

kam na samjho dahr meñ sarmāya-e-arbāb-e-ġham

chaar būñdeñ āñsuoñ kī baḌh ke tūfāñ ho ga.iiñ

ārzū-e-ālam-e-fānī thā aadam kā vajūd

ḳhvāhisheñ thiiñ jo baham ghul-mil ke insāñ ho ga.iiñ

ḳhānumāñ-barbādiyoñ kā mujh pe ehsāñ hai ki maiñ

un zamīnoñ meñ nahīñ jo bas ke vīrāñ ho ga.iiñ

merī āñkheñ shor thā jin kī vafā kā har taraf

zaḳhm dil meñ paḌte hī donoñ namak-dāñ ho ga.iiñ

uqda-hā-e-ġham se vābasta hai apnī zindagī

ham kahāñ ye mushkileñ jis vaqt āsāñ ho ga.iiñ

maiñ nisār-e-dast-e-qātil mar ke zinda ho gayā

ḳhanjar-o-shamshīr kī dhāreñ rag-e-jāñ ho ga.iiñ

ik sarāb-e-dasht thiiñ fasleñ shabāb-e-husn kī

dekhte hī dekhte āñkhoñ se pinhāñ ho ga.iiñ

kyā vafādāroñ ke jī Duube haiñ josh-e-ishq meñ

kashtiyāñ dil kī hazāroñ nazr-e-tūfāñ tūfāñ ga.iiñ

majma-e-ahbāb kī rūdād 'sāqib' kyā kahūñ

ab vo aglī sohbateñ ḳhvāb-e-pareshāñ ho ga.iiñ

husn ki wo suraten KHwab-e-pareshan ho gain

parda-e-dil mein laga kar aag pinhan ho gain

miT ke bhi aaina-e-ruKHsar-e-KHuban ho gain

KHun-e-ahl-e-ishq ki bunden gulistan ho gain

chhup gain aankhon se zarron mein numayan ho gain

bastiyan ujDi hui mil kar bayaban ho gain

dekhta kaun aur bujhata kaun us dil ki lagi

haDDiyan jal jal ke sham-e-zer-e-daman ho gain

zindagi mein kya mujhe milti balaon se najat

jo duaen kin wo sab teri nigahban ho gain

is hawa-e-dahr mein jamiyat-e-KHatir kahan

dil ko jaane do ye zulfen kyun pareshan ho gain

zoaf baqi hai koi jis ka nahin pursan-e-haal

quwwaten sab nazr-e-ishq-e-fitna-saman ho gain

luT li gardun ne aaKHir dil ki sari kaenat

kuchh tamannaen thin wo bhi waqf-e-nisyan ho gain

dost-dar-e-gul hun main kis ne qafas se kah diya

mujh ko pa kar tiliyan KHar-e-mughilan ho gain

kam na samjho dahr mein sarmaya-e-arbab-e-gham

chaar bunden aansuon ki baDh ke tufan ho gain

aarzu-e-alam-e-fani tha aadam ka wajud

KHwahishen thin jo baham ghul-mil ke insan ho gain

KHanuman-barbaadiyon ka mujh pe ehsan hai ki main

un zaminon mein nahin jo bas ke viran ho gain

meri aankhen shor tha jin ki wafa ka har taraf

zaKHm dil mein paDte hi donon namak-dan ho gain

uqda-ha-e-gham se wabasta hai apni zindagi

hum kahan ye mushkilen jis waqt aasan ho gain

main nisar-e-dast-e-qatil mar ke zinda ho gaya

KHanjar-o-shamshir ki dhaaren rag-e-jaan ho gain

ek sarab-e-dasht thin faslen shabab-e-husn ki

dekhte hi dekhte aankhon se pinhan ho gain

kya wafadaron ke ji Dube hain josh-e-ishq mein

kashtiyan dil ki hazaron nazr-e-tufan tufan gain

majma-e-ahbab ki rudad 'saqib' kya kahun

ab wo agli sohbaten KHwab-e-pareshan ho gain