idhar se jhonke jo ab ke hawa ke guzre hain

idhar se jhoñke jo ab ke havā ke guzre haiñ

na jaane kitne diyoñ ko bujhā ke guzre haiñ

tire ḳhayāl ko jo zindagī samajhte the

tire ḳhayāl se dāman bachā ke guzre haiñ

use to pā liyā lekin ham us kī rāhoñ se

ġhurūr-e-kaj-kulahī ko gañvā ke guzre haiñ

dayār-e-‘umr meñ sadiyāñ hoñ jaise teġh-ba-kaf

sadāqatoñ ke marāhil balā ke guzre haiñ

salīb-o-dār kā ho marhala ki jāda-e-sang

jidhar se guzre haiñ ham sar uThā ke guzre haiñ

jahāñ bhī dekh liye maiñ ne phuul khilte hue

gumān dil meñ tire naqsh-e-pā ke guzre haiñ

na jaane ab vo kahāñ hoñge jo idhar se 'sirāj'

diloñ meñ pyaar kī sham'eñ jalā ke guzre haiñ

idhar se jhonke jo ab ke hawa ke guzre hain

na jaane kitne diyon ko bujha ke guzre hain

tere KHayal ko jo zindagi samajhte the

tere KHayal se daman bacha ke guzre hain

use to pa liya lekin hum us ki rahon se

ghurur-e-kaj-kulahi ko ganwa ke guzre hain

dayar-e-‘umr mein sadiyan hon jaise tegh-ba-kaf

sadaqaton ke marahil bala ke guzre hain

salib-o-dar ka ho marhala ki jada-e-sang

jidhar se guzre hain hum sar uTha ke guzre hain

jahan bhi dekh liye main ne phul khilte hue

guman dil mein tere naqsh-e-pa ke guzre hain

na jaane ab wo kahan honge jo idhar se 'siraj'

dilon mein pyar ki sham'en jala ke guzre hain