ek aas ka dhundla saya hai ek pas ka tapta sahra hai

ik aas kā dhuñdlā saaya hai ik paas kā taptā sahrā hai

kyā dekh rahe ho āñkhoñ meñ in āñkhoñ meñ kyā rakkhā hai

jab khone ko kuchh paas bhī thā tab paane kā kuchh dhyān na thā

ab sochte ho kyuuñ sochte ho kyā khoyā hai kyā paayā hai

maiñ jhuuT ko sach se kyuuñ badlūñ aur raat ko din meñ kyuuñ gholūñ

kyā sunñe vaalā bahrā hai kyā dekhne vaalā andhā hai

har ḳhaak meñ hai gauhar ġhaltāñ har gauhar meñ miTTī raqsāñ

jis ruup ke sab gun gaate haiñ vo ruup bhī kis ne dekhā hai

kis dil kī baat kaheñ ham tum kis dil kā dard saheñ ham tum

dil patthar hai dil shīsha hai dil sahrā hai dil dariyā hai

ab saare taare kankar haiñ ab saare hiire patthar haiñ

is bastī meñ kyuuñ aa.e ho is bastī meñ kyā rakkhā hai

ye marnā jiinā bhī shāyad majbūrī kī do lahreñ haiñ

kuchh soch ke marnā chāhā thā kuchh soch ke jiinā chāhā hai

ek aas ka dhundla saya hai ek pas ka tapta sahra hai

kya dekh rahe ho aankhon mein in aankhon mein kya rakkha hai

jab khone ko kuchh pas bhi tha tab pane ka kuchh dhyan na tha

ab sochte ho kyun sochte ho kya khoya hai kya paya hai

main jhuT ko sach se kyun badlun aur raat ko din mein kyun gholun

kya sunne wala bahra hai kya dekhne wala andha hai

har KHak mein hai gauhar ghaltan har gauhar mein miTTi raqsan

jis rup ke sab gun gate hain wo rup bhi kis ne dekha hai

kis dil ki baat kahen hum tum kis dil ka dard sahen hum tum

dil patthar hai dil shisha hai dil sahra hai dil dariya hai

ab sare tare kankar hain ab sare hire patthar hain

is basti mein kyun aae ho is basti mein kya rakkha hai

ye marna jina bhi shayad majburi ki do lahren hain

kuchh soch ke marna chaha tha kuchh soch ke jina chaha hai