ek adhuri si kahani main sunata kaise

ik adhūrī sī kahānī maiñ sunātā kaise

yaad aatā bhī nahīñ ḳhvāb vo bikhrā kaise

kitne sāyoñ se bharī hai ye havelī dil kī

aisī bhagdaḌ meñ koī shaḳhs Thahartā kaise

phuul zaḳhmoñ ke yahāñ aur bhī chun luuñ lekin

apnā dāman maiñ karūñ aur kushāda kaise

dukh ke sailāb meñ Duubā thā vo ḳhud hī itnā

merī āñkho tumheñ detā vo dilāsa kaise

kāñch ke zaar se bas dekhtā rahtā thā tumheñ

band shīshoñ se maiñ āvāz lagātā kaise

is kā phan maiñ ne bahut der talak kuchlā thā

rah gayā saañp tire dard kā zinda kaise

ab to āñkhoñ meñ siyāhī sī bharī rahtī hai

aise aalam meñ koī ḳhvāb ho ujlā kaise

daaġh hī daaġh ubhar aa.e mire chehre par

rañg merā ai musavvir huā bhaddā kaise

ḳhushk miTTī meñ paḌā thā mire dil kā paudhā

is kī shāḳhoñ pe koī phuul bhī aatā kaise

ek adhuri si kahani main sunata kaise

yaad aata bhi nahin KHwab wo bikhra kaise

kitne sayon se bhari hai ye haweli dil ki

aisi bhagdaD mein koi shaKHs Thaharta kaise

phul zaKHmon ke yahan aur bhi chun lun lekin

apna daman main karun aur kushada kaise

dukh ke sailab mein Duba tha wo KHud hi itna

meri aankho tumhein deta wo dilasa kaise

kanch ke zar se bas dekhta rahta tha tumhein

band shishon se main aawaz lagata kaise

is ka phan main ne bahut der talak kuchla tha

rah gaya sanp tere dard ka zinda kaise

ab to aankhon mein siyahi si bhari rahti hai

aise aalam mein koi KHwab ho ujla kaise

dagh hi dagh ubhar aae mere chehre par

rang mera ai musawwir hua bhadda kaise

KHushk miTTi mein paDa tha mere dil ka paudha

is ki shaKHon pe koi phul bhi aata kaise