ek andhera sa tha jis ko raushni samjhe the hum

ik añdherā sā thā jis ko raushnī samjhe the ham

apnī is āvārgī ko zindagī samjhe the ham

vo shajar andar se ik chaTTān kī mānind thā

bhuul se buniyād jis kī khokhlī samjhe the ham

ġhaur se dekhā nazar aa.iiñ ka.ī nazdīkiyāñ

duur se jis rāste ko ajnabī samjhe the ham

vo pahāḌoñ par pighaltī barf kā manzar thā koī

raat ke saa.e meñ jis ko chāñdnī samjhe the ham

DhūñDhne nikle to phir ham DhūñDhte hī rah ga.e

zindagī tujh ko to apne paas hī samjhe the ham

ek andhera sa tha jis ko raushni samjhe the hum

apni is aawargi ko zindagi samjhe the hum

wo shajar andar se ek chaTTan ki manind tha

bhul se buniyaad jis ki khokhli samjhe the hum

ghaur se dekha nazar aain kai nazdikiyan

dur se jis raste ko ajnabi samjhe the hum

wo pahaDon par pighalti barf ka manzar tha koi

raat ke sae mein jis ko chandni samjhe the hum

DhunDhne nikle to phir hum DhunDhte hi rah gae

zindagi tujh ko to apne pas hi samjhe the hum