ek dard-e-kuhan aankh se dhoya nahin jata

ik dard-e-kuhan aañkh se dhoyā nahīñ jaatā

jab ranj ziyāda ho to royā nahīñ jaatā

miT jaane kī ḳhvāhish ko miTāyā nahīñ karte

kho dene ke armān ko khoyā nahīñ jaatā

jalte hue khaliyān meñ ugtī nahīñ fasleñ

ḳhvāboñ ko kabhī aag meñ boyā nahīñ jaatā

jab had se guzarte haiñ to ġham ġham nahīñ rahte

aur aisī zabūñ-hālī meñ royā nahīñ jaatā

tahrīr meñ bantī nahīñ jo baat hai dil meñ

kyā dard hai sheroñ meñ samoyā nahīñ jaatā

sulgī haiñ mirī aañkh meñ ik umr kī nīñdeñ

āñgan meñ lage aag to soyā nahīñ jaatā

yuuñ chhū ke dar-e-dil ko palaT aatā hai vāpas

ik vahm mohabbat kā ki goyā nahīñ jaatā

ab 'sūfiya' is tarah se dil pe nahīñ bantī

ab ashkoñ se āñchal ko bhigoyā nahīñ jaatā

ek dard-e-kuhan aankh se dhoya nahin jata

jab ranj ziyaada ho to roya nahin jata

miT jaane ki KHwahish ko miTaya nahin karte

kho dene ke arman ko khoya nahin jata

jalte hue khaliyan mein ugti nahin faslen

KHwabon ko kabhi aag mein boya nahin jata

jab had se guzarte hain to gham gham nahin rahte

aur aisi zabun-haali mein roya nahin jata

tahrir mein banti nahin jo baat hai dil mein

kya dard hai sheron mein samoya nahin jata

sulgi hain meri aankh mein ek umr ki ninden

aangan mein lage aag to soya nahin jata

yun chhu ke dar-e-dil ko palaT aata hai wapas

ek wahm mohabbat ka ki goya nahin jata

ab 'sufiya' is tarah se dil pe nahin banti

ab ashkon se aanchal ko bhigoya nahin jata