اک دریچہ نہیں دیوار میں گھر کیسا ہے

اک دریچہ نہیں دیوار میں گھر کیسا ہے

ہونٹ لوگوں کے سلے ہیں یہ نگر کیسا ہے

ہم جہاں ہیں وہاں آباد ہے راون ہر سو

کوئی بتلائے ہمیں رام نگر کیسا ہے

چار جانب ہے اجالوں کا سمندر لیکن

چونک اٹھتا ہوں ہر آہٹ پہ یہ ڈر کیسا ہے

کوئی ترسیل کی صورت نظر آتی ہی نہیں

کس سے دریافت کروں شہر ہنر کیسا ہے

خود پہ کرتا ہے شب و روز ستم ہنس ہنس کر

سوچتا ہوں کہ وہ پتھر کا جگر کیسا ہے

آندھیوں میں تو سبھی پیڑ زمیں بوس ہوئے

پھر بھی فردوسؔ سلامت یہ شجر کیسا ہے