ek din zaban sukut ki puri banaunga

ik din zabāñ sukūt kī puurī banā.ūñgā

maiñ guftugū ko ġhair-zarūrī banā.ūñgā

tasvīr meñ banā.ūñgā donoñ ke haath aur

donoñ meñ ek haath kī duurī banā.ūñgā

muddat samet jumla zavābit hoñ tai-shuda

ya.anī ta.alluqāt ubūrī banā.ūñgā

tujh ko ḳhabar na hogī ki maiñ ās-pās huuñ

is baar hāzirī ko huzūrī banā.ūñgā

rañgoñ pe iḳhtiyār agar mil sakā kabhī

terī siyāh putliyāñ bhūrī banā.ūñgā

jaarī hai apnī zaat pe tahqīq āj-kal

maiñ bhī ḳhalā pe ek theory banā.ūñgā

maiñ chaah kar vo shakl mukammal na kar sakā

us ko bhī lag rahā thā adhūrī banā.ūñgā

ek din zaban sukut ki puri banaunga

main guftugu ko ghair-zaruri banaunga

taswir mein banaunga donon ke hath aur

donon mein ek hath ki duri banaunga

muddat samet jumla zawabit hon tai-shuda

yani talluqat uburi banaunga

tujh ko KHabar na hogi ki main aas-pas hun

is bar haziri ko huzuri banaunga

rangon pe iKHtiyar agar mil saka kabhi

teri siyah putliyan bhuri banaunga

jari hai apni zat pe tahqiq aaj-kal

main bhi KHala pe ek theory banaunga

main chah kar wo shakl mukammal na kar saka

us ko bhi lag raha tha adhuri banaunga