ek diye ke waste har-su hawa-e-pesh-o-pas

ik diye ke vāste har-sū havā-e-pesh-o-pas

shahr meñ phailī huī hai bas fazā-e-pesh-o-pas

kar mirī maujūdgī ko kārgar mere liye

ai ḳhudā-e-lam-yazal ai māvarā-e-pesh-o-pas

aa nahīñ paatā tazalzul ārzū-e-vasl meñ

vāhima taḳhlīq kar de ik barā.e pesh-o-pas

'ishq kī pahlī nazar ham se ḳhafā hai aaj aur

dil meñ barpā hai hamāre karbalā-e-pesh-o-pas

shāḳh-e-dil se jhaḌne lagte haiñ samar ummīd ke

ḳhāmushī meñ gūñjtī hai jab sadā-e-pesh-o-pas

rakh na paayā phir safar jaarī musāfir vaqt kā

thī kisī mazbūt lahje meñ navā-e-pesh-o-pas

aap kī ulfat meñ ham sābit-qadam kyūñkar raheñ

aap ne baḳhshā hī kyā ham ko sivā.e pesh-o-pas

is tasalsul se khulā hai rang-e-do-'ālam ki ab

naam hī dil kā nahīñ dil hai sarā-e-pesh-o-pas

aap ke hote hue mā'dūm ham hone lage

pesh-o-pas hai sar-basar bas intihā-e-pesh-o-pas

ek diye ke waste har-su hawa-e-pesh-o-pas

shahr mein phaili hui hai bas faza-e-pesh-o-pas

kar meri maujudgi ko kargar mere liye

ai KHuda-e-lam-yazal ai mawara-e-pesh-o-pas

aa nahin pata tazalzul aarzu-e-wasl mein

wahima taKHliq kar de ek barae pesh-o-pas

'ishq ki pahli nazar hum se KHafa hai aaj aur

dil mein barpa hai hamare karbala-e-pesh-o-pas

shaKH-e-dil se jhaDne lagte hain samar ummid ke

KHamushi mein gunjti hai jab sada-e-pesh-o-pas

rakh na paya phir safar jari musafir waqt ka

thi kisi mazbut lahje mein nawa-e-pesh-o-pas

aap ki ulfat mein hum sabit-qadam kyunkar rahen

aap ne baKHsha hi kya hum ko siwae pesh-o-pas

is tasalsul se khula hai rang-e-do-'alam ki ab

nam hi dil ka nahin dil hai sara-e-pesh-o-pas

aap ke hote hue ma'dum hum hone lage

pesh-o-pas hai sar-basar bas intiha-e-pesh-o-pas