اک دیے کے واسطے ہر سو ہوائے پیش و پس

اک دیے کے واسطے ہر سو ہوائے پیش و پس

شہر میں پھیلی ہوئی ہے بس فضائے پیش و پس

کر مری موجودگی کو کارگر میرے لیے

اے خدائے لم یزل اے ماورائے پیش و پس

آ نہیں پاتا تزلزل آرزوئے وصل میں

واہمہ تخلیق کر دے اک برائے پیش و پس

عشق کی پہلی نظر ہم سے خفا ہے آج اور

دل میں برپا ہے ہمارے کربلائے پیش و پس

شاخ دل سے جھڑنے لگتے ہیں ثمر امید کے

خامشی میں گونجتی ہے جب صدائے پیش و پس

رکھ نہ پایا پھر سفر جاری مسافر وقت کا

تھی کسی مضبوط لہجے میں نوائے پیش و پس

آپ کی الفت میں ہم ثابت قدم کیوں کر رہیں

آپ نے بخشا ہی کیا ہم کو سوائے پیش و پس

اس تسلسل سے کھلا ہے رنگ دو عالم کہ اب

نام ہی دل کا نہیں دل ہے سرائے پیش و پس

آپ کے ہوتے ہوئے معدوم ہم ہونے لگے

پیش و پس ہے سربسر بس انتہائے پیش و پس