اک کمی ہے جو کھل رہی ہے دوست

اک کمی ہے جو کھل رہی ہے دوست

خاموشی جاں میں ڈھل رہی ہے دوست

جب وہ بدلا تو یہ ہوا احساس

میری دنیا بدل رہی ہے دوست

تھوڑی دیر اور بیٹھ میرے پاس

سن مری جاں نکل رہی ہے دوست

خواب آتے ہیں لوٹ جاتے ہیں

نیند چھت پر ٹہل رہی ہے دوست

ہائے بس ایک گل کی حسرت میں

روح کانٹو پہ چل رہی ہے دوست

عشق کے آخری پڑاؤ میں

زندگی میری پل رہی ہے دوست

میں بھی کتنا بدل گیا دیکھو

تو بھی کتنا بدل رہی ہے دوست

آنکھیں دریاؤں سی بھری ہیں اور

نیند پلکوں پہ چل رہی ہے دوست

اب نوازؔ اس طویل رستے کی

آخری شام ڈھل رہی ہے دوست