ek muddat ke baad mili ehsas jagati tanhai

ik muddat ke baa'd milī ehsās jagātī tanhā.ī

ḳhāmoshī se dhīre dhīre ghar mahkātī tanhā.ī

āvāzoñ kī bhiiḌ meñ jab bhī mujh ko pareshāñ dekhā hai

haath pakaḌ kar le aa.ī hai kuchh samjhātī tanhā.ī

āñkhoñ se jab niiñd bhaTak kar sahrā sahrā ghūmtī hai

mere sirhāne raat ga.e tak lorī gaatī tanhā.ī

bachpan meñ jab garm do-pahrī nange paañv phirtī thī

aam ke bāġhoñ meñ miltī thī ras barsātī tanhā.ī

pyaar kī ḳhvāb-rutoñ meñ kaisī jaagī soī rahtī thī

chāñd hiñDole meñ jhūlī thī jab madh-mātī tanhā.ī

pahroñ ham ne bāteñ kī haiñ pahroñ ḳhvāb sajā.e haiñ

maiñ roī to mujh se chhup kar ashk bahātī tanhā.ī

bahut dinoñ ke baa'd sañvar kar apnā chehra dekhā thā

ā.īne se jhāñk rahī thī aañkh churātī tanhā.ī

ek muddat ke ba'd mili ehsas jagati tanhai

KHamoshi se dhire dhire ghar mahkati tanhai

aawazon ki bhiD mein jab bhi mujh ko pareshan dekha hai

hath pakaD kar le aai hai kuchh samjhati tanhai

aankhon se jab nind bhaTak kar sahra sahra ghumti hai

mere sirhane raat gae tak lori gati tanhai

bachpan mein jab garm do-pahri nange panw phirti thi

aam ke baghon mein milti thi ras barsati tanhai

pyar ki KHwab-ruton mein kaisi jagi soi rahti thi

chand hinDole mein jhuli thi jab madh-mati tanhai

pahron hum ne baaten ki hain pahron KHwab sajae hain

main roi to mujh se chhup kar ashk bahati tanhai

bahut dinon ke ba'd sanwar kar apna chehra dekha tha

aaine se jhank rahi thi aankh churaati tanhai