اک نیا منظر ہر اک کاوش کے پس منظر میں تھا

اک نیا منظر ہر اک کاوش کے پس منظر میں تھا

کوہ پیمانی کا سودا کوہکن کے سر میں تھا

ہر اضافت سے جدا ہوتا تو تجھ کو جانتا

آدمی وقت و مکاں کے گنبد بے در میں تھا

دست قاتل کا ارادہ سب پہ ظاہر تھا مگر

سب سے پوشیدہ تھا وہ مفہوم جو خنجر میں تھا

کون بتلائے کہ بے معنی ہے اشیا کا تضاد

یہ حقیقت ہے کہ ہر زرخیز اک بنجر میں تھا

جسم کی دیوار سے ٹکرا کے نظریں مڑ گئیں

لوگ باہر ڈھونڈھتے تھے اور میں اپنے گھر میں تھا

چشم بستہ سے تھا میں آوارۂ دشت و جبل

جب کھلیں آنکھیں تو میں لیٹا ہوا بستر میں تھا