ek sa’at-e-duzdida-o-nayab se aage

ik sā’at-e-duzdīda-o-nāyāb se aage

hai 'arsa-e-nā-ḳhufta koī ḳhvāb se aage

ik 'aks hai paanī meñ farozāñ kisī gul kā

aur maskan-e-gul hai kahīñ tālāb se aage

lagtā hai ki sad mehr liye apne jilau meñ

chaltā hai koī anjum-o-mahtāb se aage

kyā un ko nazar aate bhalā ḳhaak meñ gauhar

guzre jo nahīñ ḳhvāhish-e-zartāb se aage

saa.e haiñ ka.ī saqf o dar-o-bām ke pīchhe

barzaḳh haiñ ka.ī mimbar-o-mehrāb se aage

ā.īna huī yuuñ hameñ lā-hāsilī apnī

hai reg-e-ravāñ qarya-e-shādāb se aage

ham rokte kaise dil-e-ḳhamyāza-talab ko

jaanā thā use mauja-e-girdāb se aage

'uryānī-e-jāñ apnī hameñ ḳhuub hai 'at.har'

ham log ki haiñ atlas-o-kamḳhvāb se aage

ek sa’at-e-duzdida-o-nayab se aage

hai 'arsa-e-na-KHufta koi KHwab se aage

ek 'aks hai pani mein farozan kisi gul ka

aur maskan-e-gul hai kahin talab se aage

lagta hai ki sad mehr liye apne jilau mein

chalta hai koi anjum-o-mahtab se aage

kya un ko nazar aate bhala KHak mein gauhar

guzre jo nahin KHwahish-e-zartab se aage

sae hain kai saqf o dar-o-baam ke pichhe

barzaKH hain kai mimbar-o-mehrab se aage

aaina hui yun hamein la-hasili apni

hai reg-e-rawan qarya-e-shadab se aage

hum rokte kaise dil-e-KHamyaza-talab ko

jaana tha use mauja-e-girdab se aage

'uryani-e-jaan apni hamein KHub hai 'athar'

hum log ki hain atlas-o-kamKHwab se aage