ek sitara jo lab-e-ju se mujhe dekhta hai

ik sitāra jo lab-e-jū se mujhe dekhtā hai

bār-e-avval mire pahlū se mujhe dekhtā hai

shaam kī chup meñ sunā kartā hai dhaḌkan merī

aur kabhī sub.h ke aañsū se mujhe dekhtā hai

din kī ḳhurjīñ meñ chhupā kar koī āñkheñ apnī

shab-kade meñ kisī jugnū se mujhe dekhtā hai

ā.ina-ḳhāne meñ lā kar vo charāġh-e-tāza

sho'la-e-'aks ke jaadū se mujhe dekhtā hai

khol rakhtā hai amaañ ke vo ka.ī dar mujh par

aur kabhī chashm-e-hadaf-jū se mujhe dekhtā hai

saf-ba-saf kar ke mujhe apne muqābil aksar

vo mire āhan-o-bāzū se mujhe dekhtā hai

daam dar daam bichhā kar koī hairat apnī

dasht meñ vahshat-e-āhū se mujhe dekhtā hai

apnī poroñ meñ parakhtā hai mujhe rangoñ se

aur kabhī ḳhuun kī ḳhushbū se mujhe dekhtā hai

ḳhud ko poshīda rakhūñ us se to kaise 'at.har'

dekhtā hai to vo har-sū se mujhe dekhtā hai

ek sitara jo lab-e-ju se mujhe dekhta hai

bar-e-awwal mere pahlu se mujhe dekhta hai

sham ki chup mein suna karta hai dhaDkan meri

aur kabhi subh ke aansu se mujhe dekhta hai

din ki KHurjin mein chhupa kar koi aankhen apni

shab-kade mein kisi jugnu se mujhe dekhta hai

aaina-KHane mein la kar wo charagh-e-taza

sho'la-e-'aks ke jadu se mujhe dekhta hai

khol rakhta hai aman ke wo kai dar mujh par

aur kabhi chashm-e-hadaf-ju se mujhe dekhta hai

saf-ba-saf kar ke mujhe apne muqabil aksar

wo mere aahan-o-bazu se mujhe dekhta hai

dam dar dam bichha kar koi hairat apni

dasht mein wahshat-e-ahu se mujhe dekhta hai

apni poron mein parakhta hai mujhe rangon se

aur kabhi KHun ki KHushbu se mujhe dekhta hai

KHud ko poshida rakhun us se to kaise 'athar'

dekhta hai to wo har-su se mujhe dekhta hai