ek wo hain jo kufr baken to nara hai aur tali hai

ik vo haiñ jo kufr bakeñ to nā'ra hai aur taalī hai

ik ham haiñ jo sach boleñ to DanDā hai aur gaalī hai

chartī hai aġhyār ke sabze detī hai ghar apne duudh

maiñ us charvāhe ke sadqe bhaiñs ye jis ne paalī hai

mausam yuuñ to badal rahā hai ḳhizāñ ke Dere Daale haiñ

sāvan ke jitne andhe haiñ un ke ghar hariyālī hai

'ishq karo to hosh meñ aa kar āgā-pīchhā bhī dekho

hai kis turram ḳhaañ kī beTī kis rustam kī saalī hai

jis ko dekho vo apne ko shā'ir samjhe baiThā hai

maiñ 'ġhālib' huuñ ye 'momin' hai vo maulānā 'hālī' hai

husn kaTīlā ho to us ke mirzā jī bhī 'āshiq' haiñ

husn vo chāhe amrīkan hai yā koī bangālī hai

ek wo hain jo kufr baken to na'ra hai aur tali hai

ek hum hain jo sach bolen to DanDa hai aur gali hai

charti hai aghyar ke sabze deti hai ghar apne dudh

main us charwahe ke sadqe bhains ye jis ne pali hai

mausam yun to badal raha hai KHizan ke Dere Dale hain

sawan ke jitne andhe hain un ke ghar hariyali hai

'ishq karo to hosh mein aa kar aaga-pichha bhi dekho

hai kis turram KHan ki beTi kis rustam ki sali hai

jis ko dekho wo apne ko sha'ir samjhe baiTha hai

main 'ghaalib' hun ye 'momin' hai wo maulana 'haali' hai

husn kaTila ho to us ke mirza ji bhi 'ashiq' hain

husn wo chahe amrikan hai ya koi bangali hai