ek yaad jo mazi ki mere dil mein basi hai

ik yaad jo maazī kī mire dil meñ basī hai

saa.e kī tarah mere ta.āqub meñ lagī hai

ye silsila-e-bahr kahīñ TuuT na jaa.e

aage to faqat pyaas hai aur tishna-labī hai

afsāne kā unvān abhī tak hai adhūrā

mahfil hai sajī sāhab-e-mahfil kī kamī hai

tārīf yahī hai mire andāz-e-suḳhan kī

mahke hue alfāz kī ik shakl-garī hai

ye saaf na hogī kabhī ashkoñ kī laḌī hai

jo gard zamāne kī kitāboñ pe jamī hai

vo dekhiye tham tham ke barasne pe hai maa.il

sharminda mire ashk se sāvan kī jhaḌī hai

kyā ho gayā tujh ko mire ehsās kī duniyā

bujhte hue sho.aloñ se tapish maañg rahī hai

har ruuh meñ 'iqbāl' hai ik rang-e-latāfat

insān kī ta.amīr to miTTī se huī hai

ek yaad jo mazi ki mere dil mein basi hai

sae ki tarah mere taaqub mein lagi hai

ye silsila-e-bahr kahin TuT na jae

aage to faqat pyas hai aur tishna-labi hai

afsane ka unwan abhi tak hai adhura

mahfil hai saji sahab-e-mahfil ki kami hai

tarif yahi hai mere andaz-e-suKHan ki

mahke hue alfaz ki ek shakl-gari hai

ye saf na hogi kabhi ashkon ki laDi hai

jo gard zamane ki kitabon pe jami hai

wo dekhiye tham tham ke barasne pe hai mail

sharminda mere ashk se sawan ki jhaDi hai

kya ho gaya tujh ko mere ehsas ki duniya

bujhte hue shoalon se tapish mang rahi hai

har ruh mein 'iqbaal' hai ek rang-e-latafat

insan ki tamir to miTTi se hui hai