in aansuon ki rawani ka koi rang nahin

in āñsuoñ kī ravānī kā koī rang nahīñ

hamārī aañkh ke paanī kā koī rang nahīñ

koī bhī rang mayassar nahīñ mujhe yā'nī

mire vujūd-o-nishānī kā koī rang nahīñ

kisī-kisī kī kahānī meñ rang haiñ kyā-kyā

kisī-kisī kī kahānī kā koī rang nahīñ

na shakl karb kī koī na sūrateñ dukh kī

hamārī soz-e-nihānī kā koī rang nahīñ

kabhī to rang kā matlab nahīñ nikaltā hai

kabhī hamāre ma'ānī kā koī rang nahīñ

sivā.e zard na kar paa.e apne bachpan ko

javāñ hue to javānī kā koī rang nahīñ

akele misra'-e-avval meñ koī ruup nahīñ

akele misra'-e-sānī kā koī rang nahīñ

in aansuon ki rawani ka koi rang nahin

hamari aankh ke pani ka koi rang nahin

koi bhi rang mayassar nahin mujhe ya'ni

mere wujud-o-nishani ka koi rang nahin

kisi-kisi ki kahani mein rang hain kya-kya

kisi-kisi ki kahani ka koi rang nahin

na shakl karb ki koi na suraten dukh ki

hamari soz-e-nihani ka koi rang nahin

kabhi to rang ka matlab nahin nikalta hai

kabhi hamare ma'ani ka koi rang nahin

siwae zard na kar pae apne bachpan ko

jawan hue to jawani ka koi rang nahin

akele misra'-e-awwal mein koi rup nahin

akele misra'-e-sani ka koi rang nahin