ان آنسوؤں کی روانی کا کوئی رنگ نہیں

ان آنسوؤں کی روانی کا کوئی رنگ نہیں

ہماری آنکھ کے پانی کا کوئی رنگ نہیں

کوئی بھی رنگ میسر نہیں مجھے یعنی

مرے وجود و نشانی کا کوئی رنگ نہیں

کسی کسی کی کہانی میں رنگ ہیں کیا کیا

کسی کسی کی کہانی کا کوئی رنگ نہیں

نہ شکل کرب کی کوئی نہ صورتیں دکھ کی

ہماری سوز نہانی کا کوئی رنگ نہیں

کبھی تو رنگ کا مطلب نہیں نکلتا ہے

کبھی ہمارے معانی کا کوئی رنگ نہیں

سوائے زرد نہ کر پائے اپنے بچپن کو

جواں ہوئے تو جوانی کا کوئی رنگ نہیں

اکیلے مصرع اول میں کوئی روپ نہیں

اکیلے مصرع ثانی کا کوئی رنگ نہیں