in dinon yar ke kuchh zehn-nashin aur bhi hai

in dinoñ yaar ke kuchh zehn-nashīñ aur bhī hai

jāntā hai ki nashist un kī kahīñ aur bhī hai

ek dil thā so diyā aur kahāñ se lā.ūñ

jhūTh kahiye to maiñ kah duuñ ki nahīñ aur bhī hai

nāz-e-bejā na kiyā kījiye ham se itnā

isī andāz kā ik yār-e-hasīñ aur bhī hai

kahiyo us ġhairat-e-lailā se ye paiġhām sabā

pahlū-e-qais meñ ik dasht-nashīñ aur bhī hai

mere bulvāne kā ehsān jatāo na bahut

mehrbāñ ek but-e-parda-nashīñ aur bhī hai

in radīfoñ meñ ġhazal kyoñ na ho dushvār 'akbar'

nā-tarāshīda koī aisī zamīñ aur bhī hai

in dinon yar ke kuchh zehn-nashin aur bhi hai

jaanta hai ki nashist un ki kahin aur bhi hai

ek dil tha so diya aur kahan se laun

jhuTh kahiye to main kah dun ki nahin aur bhi hai

naz-e-beja na kiya kijiye hum se itna

isi andaz ka ek yar-e-hasin aur bhi hai

kahiyo us ghairat-e-laila se ye paigham saba

pahlu-e-qais mein ek dasht-nashin aur bhi hai

mere bulwane ka ehsan jatao na bahut

mehrban ek but-e-parda-nashin aur bhi hai

in radifon mein ghazal kyon na ho dushwar 'akbar'

na-tarashida koi aisi zamin aur bhi hai