intihā-e-ishq ho yuuñ ishq meñ kāmil bano
ḳhaak ho kar bhī nishān-e-sarhad-e-manzil bano
mere shikvoñ par ye kahnā rahm ke qābil bano
mudda.ā ye hai ki apne haal se ġhāfil bano
ġharq ho kar rol lo motī ḳhud apne vāste
Duub kar ubhro to auroñ ke liye sāhil bano
anjuman kaisī tum apnī zaat se ho anjuman
gosha-e-ḳhalvat meñ bhī baiTho to ik mahfil bano
husn-e-ḳhud-bīñ mo.ajizāt-e-ishq kā qaa.il nahīñ
qatra-hā-e-ashk-e-ḳhūnīñ jam.a ho kar dil bano
saath āzādī ke ḳhud-dārī bhī rahnā chāhiye
bahr-e-be-pāyāñ kabhī lab ḳhushkī-e-sāhil bano
ilm kā daura lahū ke saath rag rag meñ rahe
jauhar-e-qābil agar ho quvvat-e-āmil bano
sharm se tum ko simaTnā hai to simTo husn se
dil meñ ban jaao suvaidā putliyoñ meñ til bano
rabt-e-bātin kyā suno tafsīl us ijmāl kī
ham sarāpā dard hoñ aur tum sarāpā dil bano
jalne vaalo tā-ba-imkāñ zabt soz-e-ġham karo
aag jab bhaḌke charāġh-e-sarhad-e-manzil bano
kuchh dinoñ baiTho sar-e-qabr-e-'azīz'-e-be-navā
ḳhānqāhoñ meñ bahut dushvār hai kāmil bano
intiha-e-ishq ho yun ishq mein kaamil bano
KHak ho kar bhi nishan-e-sarhad-e-manzil bano
mere shikwon par ye kahna rahm ke qabil bano
muddaa ye hai ki apne haal se ghafil bano
gharq ho kar rol lo moti KHud apne waste
Dub kar ubhro to auron ke liye sahil bano
anjuman kaisi tum apni zat se ho anjuman
gosha-e-KHalwat mein bhi baiTho to ek mahfil bano
husn-e-KHud-bin moajizat-e-ishq ka qail nahin
qatra-ha-e-ashk-e-KHunin jama ho kar dil bano
sath aazadi ke KHud-dari bhi rahna chahiye
bahr-e-be-payan kabhi lab KHushki-e-sahil bano
ilm ka daura lahu ke sath rag rag mein rahe
jauhar-e-qabil agar ho quwwat-e-amil bano
sharm se tum ko simaTna hai to simTo husn se
dil mein ban jao suwaida putliyon mein til bano
rabt-e-baatin kya suno tafsil us ijmal ki
hum sarapa dard hon aur tum sarapa dil bano
jalne walo ta-ba-imkan zabt soz-e-gham karo
aag jab bhaDke charagh-e-sarhad-e-manzil bano
kuchh dinon baiTho sar-e-qabr-e-'aziz'-e-be-nawa
KHanqahon mein bahut dushwar hai kaamil bano
Source:
Anjum Kada (Pg. 18)
-
Author:
Mirza Mohammad Hadi Aziz Lakhnavi
-
- Edition: 1956
- Publisher: Anjuman Taraqqi Urdu (Hind), Aligarh
- Year of Publication: 1956
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.