is Dar se maine zulf ki uski na baat ki

is Dar se maiñ ne zulf kī us kī na baat kī

jaatī hai duur duur tak āvāz raat kī

dekhā jab aañkh khol ke misl-e-habāb tab

ma.alūm kā.enāt huī kā.enāt kī

us bulbul-e-chaman kī huī āqibat ba-ḳhair

saa.e meñ jis ne aan ke gul ke vafāt kī

maiñ huuñ sifāt hī ke tahayyur meñ ham-nashīñ

kyā baat mujh se pūchhe hai tū us kī zaat kī

dil apnā us ko dījiye yā jī ko khoiye

is ke sivā tarah nahīñ koī najāt kī

bolā agar to qand-e-mukarrar hue vo lab

aur chup rahā to ye bhī hai sūrat nabāt kī

vāqif ho kyuuñ na shola-e-ātish se dil ke vo

rahtī hai bāġhbāñ ko ḳhabar phuul paat kī

shah chaal ho rahā huuñ sanam tere ishq meñ

tū ne dikhā ke ruḳh mirī baazī hī maat kī

zulf-e-araq-fishāñ tirī jāñ-baḳhsh kyuuñ na ho

tarkīb us ne paa.ī hai āb-e-hayāt kī

us sar se ġhair sar nahīñ vāqif koī ġharaz

lazzat bayāñ meñ aatī nahīñ terī laat kī

chuuñ zindagī-o-marg haiñ aapas meñ zid 'hasan'

chashm-o-lab us kī zid hai hayāt o mamāt kī

is Dar se main ne zulf ki us ki na baat ki

jati hai dur dur tak aawaz raat ki

dekha jab aankh khol ke misl-e-habab tab

malum kaenat hui kaenat ki

us bulbul-e-chaman ki hui aaqibat ba-KHair

sae mein jis ne aan ke gul ke wafat ki

main hun sifat hi ke tahayyur mein ham-nashin

kya baat mujh se puchhe hai tu us ki zat ki

dil apna us ko dijiye ya ji ko khoiye

is ke siwa tarah nahin koi najat ki

bola agar to qand-e-mukarrar hue wo lab

aur chup raha to ye bhi hai surat nabaat ki

waqif ho kyun na shola-e-atish se dil ke wo

rahti hai baghban ko KHabar phul pat ki

shah chaal ho raha hun sanam tere ishq mein

tu ne dikha ke ruKH meri bazi hi mat ki

zulf-e-araq-fishan teri jaan-baKHsh kyun na ho

tarkib us ne pai hai aab-e-hayat ki

us sar se ghair sar nahin waqif koi gharaz

lazzat bayan mein aati nahin teri lat ki

chun zindagi-o-marg hain aapas mein zid 'hasan'

chashm-o-lab us ki zid hai hayat o mamat ki